பிரிட்டன் மிகச் சிறிய நாடாக இருந்த போதிலும் அது தன் வாணிபத்தை உலகெங்கும் விரிவு படுத்தியது. இந்தியாவிற்கும், ஆங்கிலேயர்கள் வாணிபம் செய்வதற்காகத்தான் அந்நாளில் உள்ளே புகுந்தார்கள். ஆங்கில மொழியும் வளர்ச்சியடைந்தது.
இருபத்தாறே எழுத்துக்களைக் கொண்ட ஆங்கிலம் உலகளாவிய பொது மொழியாகத் திகழுந்து வருகிறது. பிற மொழிச் சொற்களை ஏற்றுக் கொள்ளும் தன்மை ஆங்கிலத்திற்கு இருக்கிறது. மொழியின் பரிமாணத்தைச் சுருக்கிக் கொள்ளாமல் விரிவு படுத்திக் கொள்ளும் தன்மையும், காலப் போக்கில் விஞ்ஞானக் கண்டு பிடிப்புகளுக்கு ஏற்ப வளைந்து கொடுக்கும் தன்மையும் ஆங்கில மொழிக்கு இருக்கிறது .
RICE என்னும் சொல், தமிழ் மொழிச் சொல்லான அரிசியிருந்து தான் வந்தது என்பார்கள் மொழி ஆராய்ச்சியாளர்கள்! கட்டு மரம் தான் ஆங்கிலத்தில் CATAMARAN ஆனது என்பார்கள்! ஆண்டு தோறும் மேன்மேலும் ஆயிரக் கணக்கான சொற்கள் “ ஆக்ஸ்போர்டு” ஆங்கில அகராதியில் சேர்க்கப்படுகிறது.
ஆனால் இன்றோ தமிழ் ஆர்வலர்கள் பலரும் மிகக் குறுகிய கண்ணோட்டத்துடன் ஆச்சாரமாக, அதாவது, Orthodox ஆக நடந்துக் கொள்கிறார்கள். தமிழ் மொழியின் ஏக போக உரிமையாளர்கள் போல் தம்மைக் காட்டிக் கொள்கிறார்கள்!. வடமொழி எழுத்துக்கள் எனக் கூறி ஸ, ஜ, ஷ, ஹ போன்ற எழுத்துக்களை ஓரம் கட்டி வருகிறார்கள்.
தமிழ் மாதங்கள், ஆண்டுகளின் பெயர்களை நடைமுறைக்கு கொண்டுவர இயலாமல வேறு வழியின்றி ஆங்கில மாதங்களை ஏற்றுக் கொள்ளும் இவர்கள், சனவரி, சூன், சூலை, ஆகத்து என்றெல்லாம் எழுதுவதன் மூலம் தமது ஆங்கிலேய மருமகளுக்கு, பட்டுப் பாவாடையும், தாவணியும் கட்டி மகிழ்கிறார்கள்!
ஆங்கிலத்தையும் தவிர்த்து, வட மொழியையும் தவிர்த்து தொன்மை வாய்ந்த தமிழ் மொழியின், சிறகுகளை உடைத்து சிறையில் பூட்டி வைக்கிறார்கள்.
ஸ்ரீ, ஷ, ஜ, ஹ, ஸ போன்ற எழுத்துகளை தமிழில் பயன்படுத்துவன் மூலம், தமிழ் மொழியின் தரம் ஒன்றும் கெட்டு விடாது. ஷாஜஹானும்,ரோஜாவும், ராஜ ராஜ சோழனும், ஸ்டாலினும், இன்றைய குஷ்புவும், த்ரிஷாவும் பெயர் நிலைத்து வாழட்டும் !
தமிழ் செம் மொழி மாநாடு காணும் இத்தருணத்தில் தமிழின் பாதுகாவலர்களுக்கு ஒரு வேண்டுகோள்!
தமிழ் சுதந்திரமாக வாழட்டும்! ஆரியம் போல் சிதையாமல்,சீரிளமையுடன் வாழட்டும்!
ஷா, ஜா, போன்ற சிற்சில எழுத்துக்கள் தமிழ் அணங்கின் “ஸ்டிக்கர்” பொட்டுகளாகத் திகழ்ந்து விட்டுப் போகட்டுமே! இன்றைய தமிழ் பெண்கள் ஸ்டிக்கர் பொட்டுகள் வைத்துக் கொள்வது இல்லையா என்ன!
Want to write for Maniyosai?
Download our android app
ரொம்ப சரியா சொன்னீங்க. ஷ, ஜ போன்ற எழுத்துக்கள் கூட தமிழுக்கு அழகுதான் சேர்க்கிறது. ’ரோசா’ என்பதை விட ‘ரோஜா’ என்பது இன்னும் அழகாகதானிருக்கிறது. இதை உணரட்டும் தமிழ் ஆர்வலர்கள்.