ஸ்டாக்ஹாம்: அமெரிக்க ராணுவத்தின் ரகசிய ஆவணங்களை இணையதளம் மூலம் அம்பலப் படுத்திய விக்கிலீக்ஸ் இணையதளத்தின் நிறுவனர் ஜூலியன் அசாங்க் மீது கற்பழிப்பு மற்றும் இயற்கைக்கு மாறான உடலுறவு கொண்ட இரண்டு குற்றங்களுக்காக ஸ்வீடன் காவல் துறை கைது வாரண்ட் பிறப்பித்துள்ளதாக அந்நாட்டு பத்திரிகை செய்தி வெளியிட்டுள்ளது. இதனை, ஸ்வீடன் அரசு வழக்கறிஞரின் அலுவலகமும் உறுதிப் படுத்தியுள்ளது.
இராக் மற்றும் அஃப்கானிஸ்தானில் அமெரிக்க ராணுவம் செய்த அத்துமீறல்களை அம்பலப் படுத்தும் வகையில் அமெரிக்க ராணுவத்தின் 76,000 ரகசிய ஆவணங்களை விக்கிலீக்ஸ் இணையதளம் அண்மையில் வெளியிட்டது. இது ஒபாமா அரசுக்கு ஆத்திரத்தை ஏற்படுத்தியது. ராணுவ ஆவணங்களை வெளிப் படுத்துவது பொறுப்பற்ற செயல் என அமெரிக்க ராணுவம் விக்கிலீக்ஸ் இணையதளத்துக்கு மறைமுக எச்சரிக்கை விடுத்திருந்தது.
இந்நிலையில், அமெரிக்க ராணுவத்தின் போர் குற்றங்களை அம்பலப் படுத்தும் மேலும் 15,000 ஆவணங்களை வெளியிடப் போவதாக விக்கிலீக்ஸ் நிறுவனர் அசாங்க் சில தினங்களுக்கு முன் அறிவித்தார். இது அமெரிக்க அரசுக்கு மேலும் ஆத்திரத்தை ஏற்படுத்தியுள்ளது.
இதற்கிடையே, ஜூலியன் அசாங்க் மீது கற்பழிப்பு மற்றும் இயற்கைக்கு மாறான உடலுறவு கொண்ட இரண்டு குற்றங்களுக்காக ஸ்வீடன் காவல் துறை கைது வாரண்ட் பிறப்பித்துள்ளதாக அந்நாட்டு பத்திரிகை ஒன்று செய்தி வெளியிட்டுள்ளது. இதனை, ஸ்வீடன் அரசு வழக்கறிஞரின் அலுவலகமும் உறுதிப் படுத்தியுள்ளது.
இந்த செய்தியை விக்கிலீக்ஸ் இணையதளம் திட்டவட்டமாக மறுத்துள்ளது. இது குறித்து விக்கிலீக்ஸ் வெளியிட்டுள்ள செய்திக் குறிப்பில் கூறப் பட்டிருப்பதாவது:
“அசாங்க் மீதான கற்பழிப்பு குற்றச்சாட்டு பற்றி இன்று (ஆக.21)தெரிய வந்தது. அசாங்க் மீது விக்கிலீக்ஸ் குழு உயர்ந்த மதிப்பு வைத்துள்ளது. இந்த விவகாரத்தில் அவருக்கு விக்கிலீக்ஸ் குழு உறுதுணையாக இருக்கும். தன் மீதான அவப்பெயரை அசாங்க் சட்ட ரீதியாக களைவார்.விக்கிலீக்ஸின் செயல்பாடுகள் வழக்கம் போல் தொடரும்.”
இவ்வாறு விக்கிலீக்ஸ் தெரிவித்துள்ளது.
Want to write for Maniyosai?
Download our android app
